Qvardioladan ayrılıq qərarı

“Mançester Siti”nin baş məşqçisi Xosep Qvardiola İngiltərə klubundan ayrılmaq niyyətindədir. 

Xəbərin.az xəbər verir ki, bu barədə BBC məlumat yayıb.

Mənbənin bildirdiyinə görə, hazırda “şəhərlilər” düşərgəsində mütəxəssisin gələcəyi ilə bağlı qeyri-müəyyənlik var və yekun qərar mövsümün sonuna yaxın veriləcək. Qeyd olunur ki, ispan çalışdırıcı ilkin qərarını dəyişib komandada qalsa belə, 2027-ci ildə başa çatan müqaviləsini uzatması çətin görünür.

Hazırda “Mançester Siti” İngiltərə Premyer Liqasında 24 turdan sonra topladığı 47 xalla ikinci pillədə qərarlaşıb. Komanda eyni zamanda Çempionlar Liqasının 1/8 finalına, İngiltərə Liqa kubokunun finalına və ölkə kubokunun 1/16 finalına yüksəlib.

55 yaşlı Qvardiola 2016-cı ildən “Mançester Siti”yə rəhbərlik edir. Onun rəhbərliyi altında klub 6 dəfə İngiltərə çempionu, 2 dəfə ölkə kubokunun, 4 dəfə Liqa kubokunun, 3 dəfə isə Superkubokun qalibi olub. 2023-cü ildə isə komanda Çempionlar Liqasını, UEFA Superkubokunu və klublararası dünya çempionatını qazanıb.