Beş qol, bir finalist

Türkiyə Superkubokunun yarımfinal mərhələsində “Qalatasaray” və “Trabzonspor” komandaları qarşılaşıb. Qaziantep stadionunda təşkil olunan görüşdə üstün oyun sərgiləyən tərəf İstanbul təmsilçisi olub. 

Matçın ilk hissəsində oyuna nəzarəti ələ alan “sarı-qırmızılılar” 38-ci dəqiqədə Barış Alper Yılmazın qolu ilə hesabı açıblar. İlk yarının sonlarında təzyiqini davam etdirən “Qalatasaray” əlavə olunmuş vaxtın 3-cü dəqiqəsində Eren Elmalının dəqiq zərbəsi sayəsində fərqi iki topa çatdırıb və fasiləyə üstünlüklə yollanıb. 

İkinci hissəyə “Trabzonspor” daha fəal başlayaraq 55-ci dəqiqədə Felipe Auqustonun qolu ilə hesab arasındakı fərqi azaldıb. Bununla belə, oyun üstünlüyü yenidən “Qalatasaray”ın tərəfində olub. 63-cü dəqiqədə Yunus Akgün adını tabloya yazdıraraq komandasının üçüncü qoluna imza atıb. Qarşılaşmanın sonlarına yaxın, 81-ci dəqiqədə Mauro İkardi vurduğu qolla matçın yekun nəticəsini müəyyənləşdirib — 4:1. 

Beləliklə, “Qalatasaray” inamlı qələbə qazanaraq Türkiyə Superkubokunda final mərhələsinə yüksəlib. 

Qeyd edək ki, “Qalatasaray”ın Türkiyə Superkubokunun final mərhələsindəki rəqibi “Fənərbaxça” – “Samsunspor” qarşılaşmasının qalibi olacaq.

Ruslan Göycəyev