IŞİD Rakkada nəzarət məntəqəsinə hücum etdi – 4 təhlükəsizlik əməkdaşı öldü

Suriyanın şimalının mərkəzi hakimiyyətə inteqrasiyası prosesi davam edərkən IŞİD Rakka şəhərində təhlükəsizlik qüvvələrinə hücum edib.

Xəbərin.az Suriya dövlət televiziyasına istinadən məlumat verir ki, 23 fevralda nəzarət məntəqəsinə edilən silahlı hücum nəticəsində 4 təhlükəsizlik əməkdaşı həlak olub.

Hadisə təsdiqlənərsə, bu, Bəşşar Əsədin devrilməsindən sonra İŞİD-in Suriyada həyata keçirdiyi ən ölümcül hücumlardan biri hesab ediləcək. Qruplaşma hücumu birbaşa üzərinə götürməsə də, bundan iki gün əvvəl yeni əməliyyat mərhələsinə keçdiyini elan etmişdi.

Bu arada, Suriya Demokratik Qüvvələri (SDQ) ilə Şam arasında hərbi inteqrasiya danışıqları davam edir. Rəsmi məlumata görə, şimal-şərq bölgələrində yerləşən bir sıra ərazilər artıq mərkəzi hökumətin nəzarətinə keçib. ABŞ qüvvələrinin isə bölgədən mərhələli şəkildə çıxmağa başladığı bildirilir.

SDQ komandanı Məzlum Abdi razılaşmanın hazırkı şərtlər daxilində mümkün olan ən yaxşı variant olduğunu desə də, razılaşma pozularsa mübarizəni davam etdirəcəklərini vurğulayıb.