İsrail ordusu atəşkəsə rəğmən Qəzzanın şimalına hücum edib

İsrail ordusu atəşkəs rejiminə baxmayaraq Qəzza zolağının şimal bölgələrini hava zərbələri və artilleriya atəşinə tutub.

Xəbərin.az məlumat verir ki, İsrailin 10 oktyabr 2025-ci ildə qüvvəyə minmiş atəşkəsi pozaraq həyata keçirdiyi hücumlar nəticəsində 2 fələstinli yaralanıb. Hadisə şahidlərinin bildirdiyinə görə, İsrail döyüş təyyarələri və artilleriya bölmələri Qəzzanın şimalında yerləşən Beyt Lahiya şəhərinin Şeyx Zayed bölgəsini hədəfə alıb. Eyni zamanda İsrail helikopterlərinin də əraziyə intensiv atəş açdığı qeyd olunur.

Bölgə sakinləri Qəzzanın şimalındakı müxtəlif ərazilərdə güclü partlayış səsləri eşitdiklərini, bu səslərin İsrail ordusunun nəzarətində olan istiqamətlərdən gəldiyini bildiriblər.

Digər tərəfdən, İsraildə yayımlanan Kanal 12 televiziyasının məlumatına görə, İsrail ordusu Qəzzanın şimalında, Beyt Hanun yaxınlığında yerləşən bir tuneldən 5 nəfərin çıxdığını aşkarlayıb. Həmin şəxslərin hədəfə alındığı hücum nəticəsində 4 nəfərin həyatını itirdiyi iddia olunur.