Instagram rəhbəri: “Gündə 16 saat istifadə asılılıq deyil”

ABŞ-də dünyanın ən böyük texnologiya şirkətlərindən olan Meta və Google-a qarşı uşaqlarda və gənclərdə rəqəmsal asılılıq yaratmaq ittihamı ilə açılan məhkəmə prosesi başlayıb. Los-Anceles şəhərində keçirilən bu məhkəmə ölkə üzrə eyni mövzu ilə bağlı qaldırılan minlərlə iddiadan ilkidir.

Xəbərin.az xəbər verir ki, məhkəmə çərçivəsində Instagram platformasının rəhbəri Adam Mosseri ifadə verib. O, gündə 16 saat sosial mediadan istifadənin “problemli davranış” ola biləcəyini qəbul etsə də, bunun tibbi və ya psixoloji baxımdan asılılıq kimi qiymətləndirilməsinin düzgün olmadığını bildirib. Mosseri, Meta şirkətinin istifadəçilərin təhlükəsizliyi, xüsusilə də yeniyetmələrin qorunması üçün müxtəlif tədbirlər gördüyünü də vurğulayıb.

İddianın mərkəzində K.G.M. baş hərfləri ilə təqdim olunan 20 yaşlı qadın dayanır. O iddia edir ki, sosial media platformaları onda uzunmüddətli narahatlıq, bədən imici pozuntusu və intihar düşüncələri kimi ciddi psixoloji problemlərə səbəb olub. Məhkəmə prosesində bu cür iddiaların artması fonunda sosial media şirkətlərinin gənclər üzərində təsiri daha geniş şəkildə araşdırılır.

Altı həftə davam etməsi gözlənilən məhkəmə prosesi sosial media platformalarının uşaqlar və yeniyetmələr üçün mümkün risklərinə görə hüquqi məsuliyyət daşıyıb-daşımadığına aydınlıq gətirən ilk ciddi hüquqi presedentlərdən biri kimi qiymətləndirilir.